අධ්‍යාපනයෙන් රට සවිබලගැන්වීම සඳහා පියවරෙන් පියවර ක්‍රියා කළ යුතු බව චීන ජනාධිපති ෂී ජින් පිං මහතා අවධාරණය කරයි. චීනයේ 40 වැනි ජාතික ගුරු දිනය නිමිති කරගනිමින් පැවති ජාතික අධ්‍යාපන සම්මේලනයට එක්වෙමින් ජනාධිපතිවරයා මේ බව ප්‍රකාශ කළේය.එය ඊයේ (10) බෙයිජිං අගනුවර දී පැවැත්විණ.
අධ්‍යාපනය රටක් සවිබලගැන්වීම හා ජාතික පුනරුදය සඳහා වන වැදගත් අඩිතාලමකි. වසර 2035 වන විට අධ්‍යාපන ක්ෂේත්‍රයෙන් ප්‍රබල රටක් බවට පත් වීම චීනයේ ඉලක්කයයි. එම ඉලක්කය සාක්ෂාත් කිරීම අභියෝගයක් වුව ද , චීන කොමියුනිස්ට් පක්ෂයේ අධ්‍යාපන ප්‍රතිපත්ති අනුගමනය කිරීම, විද්‍යාව හා තාක්ෂණයෙන් රට පුනර්ජීවනය කිරීමේ උපායමාර්ගය සහ අධ්‍යාපන නවීකරණය වේගවත් කිරීම මගින් එම ඉලක්කය සපුරාගත හැකි බවට චීන ජනාධිපතිවරයා විශ්වාසය පළකළේය.
ගුරුවරුන්ගේ වෘත්තීය හැකියා සංවර්ධනය ශක්තිමත් කරමින් විශිෂ්ට සිසු පරපුරක් බිහිකිරීම මෙන්ම විදේශ රටවල් සමග අධ්‍යාපන ක්ෂේත්‍රයේ හුවමාරු හා සහයෝගිතා ශක්තිමත් කිරීමේ අවශ්‍යතාව ද ෂී ජින් පිං මහතා එහිදී අවධාරණය කළේය.
අරෝෂා සමරදිවාකර
බෙයිජිං සිට..